Kerskálar

 

Framleiðsla á áli í álverinu á Grundartanga fer fram í fjórum kerskálum. Í kerskálunum eru samtals 520 ker með forbökuðum kolaskautum. Kerin eru lokuð og tengd reykhreinsivirki sem hreinsar útblástur frá þeim. Í kerskálunum eru þjónustukranar sem þjóna kerunum. Kranarnir eru notaðir til að skipta um skaut, við áltöku og við áfyllingu álflúoríðs. Lokað þéttflæðikerfi flytur súrálið frá geymslusílói við höfnina til keranna í kerskálunum.  Í kerunum eru brjótar sem brjóta gat á raflausnarskurnina svo að matarar, sem eru notaðir til að bæta bæði súráli og álflúoríði í kerin, komi efnunum frá sér. Rafmagnið sem fer um raflausnina í kerunum veldur því að súrál klofnar í súrefni og hreint ál. Kolaskaut í kerunum eyða súrefninu með bruna. Ferlinu í kerunum er stjórnað með VAW ELAS tölvustýrðu stjórnkerfi.

 

 

Hvað er súrál?

Við álvinnslu er notað hráefnið báxít en það er leifar af jarðvegi sem hefur auðgast að áli við útskolun annarra jarðefna við efnaveðrun í heitu og röku loftslagi nærri miðbaug. Úr báxítinu er súrálið unnið og ef við ímyndum okkur að við séum við vinnu í álverinu í Helguvík, sjáum við að súrálið er hvítt duft. Að meðaltali þarf að vinna fjögur tonn af báxíti fyrir tvö tonn af súráli sem verða svo að einu tonni af áli út úr álverinu.

 

Málmgrýtið súrál er efnasamband áls og súrefnis. Efnaformúlan Al2O3 vísar til þess að súrál samanstendur af tveimur álfrumeindum á móti þremur súrefnisfrumeindum. Ólíkt öðrum málmum er erfitt að vinna ál beint úr málmgrýtinu. Efnatengslin milli áls og súrefnis eru svo sterk að við framleiðsluferlið í álverinu verður að rjúfa þessi tengsl með rafgreiningu. Álið dregst að öðru skautinu þannig að eftir stendur hreinn málmurinn.